Amo 8 | NdeIBE | STEP | Nanku engakutshengiswa nguJehova Wobukhosi: isitsha esilezithelo ezivuthiweyo.

Amos 8

Isitsha sezithelo ezivuthiweyo

1 Nanku engakutshengiswa nguJehova Wobukhosi: isitsha esilezithelo ezivuthiweyo.

2 Wangibuza wathi, “Kuyini okubonayo, Amosi?” Mina ngaphendula ngathi, “Yisitsha esilezithelo ezivuthiweyo.” UJehova wasesithi kimi, “Isikhathi sabantu bami bako-Israyeli sesifikile; kangisabaxoleli futhi.

3 “Ngalolosuku,” kutsho uJehova Wobukhosi, “izingoma zethempelini zizaphenduka zibe yikulila. Izidumbu ezinengi kakhulu zidaklazelwe indawo yonke! Thulani!”

4 Zwanini lokhu, lina elinyathezela abaswelayo, lichitha labayanga elizweni,

5 lisithi, “Ukuthwasa kweNyanga Entsha kuzaphela nini ukuze sithengise amabele, leSabatha lidlule ukuze sithengise ingqoloyi na? Sinciphise isilinganiso, sikhweze intengo siqilibezele ngezilinganiso zenkohliso,

6 sithenge abayanga ngesiliva, abaswelayo sibathenge ngamanyathelo, sithengise lamakhoba ngengqoloyi.

7 UJehova ufungile ngokuziQhenya kukaJakhobe: “Angisoze ngakhohliswa loba yini abayenzileyo.

8 “Ilizwe kaliyikuthuthumela ngalokhu yini labo bonke abahlala kulo kabayikulila na? Ilizwe lonke lizaqubuka njengeNayili; lizadungeka beselitshona phansi njengomfula waseGibhithe.”

9 “Ngalolosuku,” kutsho uJehova Wobukhosi, “ngizakwenza ilanga litshone emini, ngenze emhlabeni kube mnyama emini ekhanyayo.

10 Ngizaphendula amadili enu okukhonza abe yikulila lokuhlabelela kwenu konke kube yikukhala. Lonke ngizalenza ligqoke amasaka, njalo liphuce amakhanda enu. Lesosikhathi ngizasenza sifane lokulilela indodana eyiyo yodwa lokuphela kwaso kube njengosuku olubuhlungu.

11 “Izinsuku ziyeza,” kutsho uJehova Wobukhosi, “lapho engizathumela indlala elizweni hatshi indlala yokudla kumbe ukomela amanzi, kodwa indlala yokuzwa amazwi kaJehova.

12 Abantu bazaphamazela besuka elwandle besiya elwandle, njalo bazule kusukela enyakatho kusiya empumalanga, bedinga ilizwi likaJehova, kodwa kabayikulithola.

13 “Ngalolosuku “izintombi ezinhle lezinsizwa eziqinileyo zizaqaleka ngenxa yokoma.

14 Bona labo abafunga ngehlazo leSamariya loba bathi, ‘Ngeqiniso njengoba unkulunkulu wakho ephila, wena Dani,’ loba bathi, ‘Ngeqiniso njengoba unkulunkulu waseBherisheba ephila,’ bazakuwa, bangaphindi bavuke futhi.”